![خطة الحبة السامة لمنع ايلون ماسك من الاستحواذ على تويتر](https://digzone.net/wp-content/uploads/2022/04/١.png)
خطة الحبة السامة لمنع ايلون ماسك من الاستحواذ على تويتر
يمكن دي تكون أول مرة تسمع عن خطة الحبة السامة او Poison Pill Plan، وده لأن الخطة دي هي دايماً خط الدفاع الأخير لما تنفذ كل الحلول، وعدد المرات اللي تم استخدام الخطة دي فيها معدودة..
وهي خط دفاع حاسم تجاه أي عملية استحواذ عدائية زي اللي بيحصل دلوقتي بين ايلون ماسك وتويتر، لكنها في نفس الوقت خطر كبير على الشركة.
خلينا نشرح بوضوح تويتر عملت ايه..
فجأة من كام شهر ايلون ماسك اشترى 9% من أسهم تويتر وبكدة بقى أعلى Shareholder او مساهم في الشركة وده اعطاله حق الدخول في مجلس الإدارة، أول الشهر ده ايلون ماسك عرض انه يشتري 100% من اسهم تويتر برقم ضخم جداً وهو حوالي 54 دولار للسهم، يعني حوالي 43 مليار دولار.
تم رفض عرض ايلون ماسك تماماً من الإدارة، ايلون ماسك معجبوش الكلام وراح للمساهمين وبدأ يتفاوض معاهم بعيد عن الإدارة علشان يشتري الأسهم بتاعتهم لحد مايقدر يستحوذ على الشركة كلها بالأمر الواقع..
وبدأ يخبط في مجلس إدارة تويتر وقال ان كل اللي قاعدين على مجلس الإدارة دول بيمتلكوا فقط حوالي 2% من تويتر ولا يستحقوا التواجد في مناصبهم وتويتر هيكون في النازل معاهم.
طبعاً مجلس الإدارة لقى ان في خطر حقيقي قادم وان ايلون ماسك ممكن فعلاً يشتري نصيب المساهمين ويستحوذ على الشركة، لأن محدش في تويتر بيمتلك 51% من الشركة علشان يكون الآمر والناهي، لكن اسهم الشركة متوزعة في السوق.
في 14 ابريل اللي فات مجلس الإدارة اجتمع وقرر تنفيذ خطة الحبة السامة، وهي باختصار ان أي حد هيستحوذ على نسبة 15% من الشركة لوحده هيتم طرح اسهم اضافية بتخفيض 50% على سعر السهم لجميع المساهمين،..
يعني لو ايلون ماسك نفذ تهديده وقدر يشتري اسهم من المساهمين ووصل لـ 15%، مجلس الإدارة هيطرح اسهم بنص السعر في وقتها وأي حد من المساهمين يقدر يشتري الأسهم بالسعر ده..
وده معناه ان قيمة الشركة ممكن تنزل النص بس في الوقت ده هتكون فرصة عظيمة للمساهمين انهم يزودوا اسهمهم وأرباحهم، وبكده عرض ايلون ماسك مش هيكون ليه أي قيمة.
يعني من الآخر عليا وعلى أعدائي، في الأفلام الأجنبي بتشوف ان الشخص اللي بيحمل اسرار سواء كان مجرم او عميل سري لما بيتقبض عليه بيكون معاه حبة سامة وبيبلعها علشان يموت نفسه علشان محدش يقدر يستخرج منه أي معلومات .. من هنا جه اسم الخطة، وعلشان كدة هي آخر حاجة ممكن يتم اللجوء ليها.
طبعاً تنفيذ الخطة دي خطر جداً ولازم تكون مدروسة، لأنها ممكن تجيب الشركة الأرض لأنك بتقلل قيمة الشركة بنفسك ولو المساهمين موقفوش في ظهر مجلس الإدارة كل حاجة هتروح، لأنها بتعتمد في المقام الأول على اغراء المساهمين باعطاؤهم اسهم بتخفيض 50% من شركة ناجحة جداً.
علشان كدة تويتر أعلن تفعيل الخطة دي لمدة سنة تبدأ 14 ابريل 2022 وتنتهي 14 ابريل 2023.
الخطة دي اتنفذت قبل كدة في 2012 من نتفلكس، لما “كارل ايكاهن” واحد من المستثمرين استحوذ على 10% من اسهم الشركة وكان عاوز يستحوذ على نتفلكس بنفس الطريقة، نتفلكس فعلت الخطة وهددت لو كمل في اللي بيعمله هتغرق السوق اسهم بنص التمن وعليا وعلى أعدائي.
شركة بابا جونز هي كمان عملت كدة في 2018، لما عزلوا المؤسس “جون شناتر” من مجلس الإدارة بسبب مشاكل بينهم، وجون بدأ يستحوذ على نسبة كبيرة من المساهمين، ففعلوا الخطة دي علشان يمنعوه.