Basic Ads اعلانات رخيصة بلا استهداف
واضح ان شركة ميتا مش قادرة تقف في وش آبل بخصوص خاصية الـ App Tracking
وخلاص بتتعامل مع الأمر مهما كلفها، ده غير التسريبات اللي بتظهر ان جوجل هي كمان عاوزة تطلق الميزة دي في الاندرويد، ودي هتبقى الضربة القاضية لفيس بوك
وده السبب الرئيسي في تطوير النوع الجديد ده من اعلانات فيس بوك واللي اتسمى بشكل مبدأي Basic Ads.
أحد مهندسي فيس بوك مجهول الهوية سرب شوية معلومات لـ
Business Insider
عن نوعية الاعلانات الجديدة اللي فيس بوك شغال عليها، وان فيس بوك هيعلن عنها تحت شعار Privacy-friendly ads
، أي اعلانات بتحترم الخصوصية.
الاعلانات دي هتكون عبارة عن اعلانات بدائية جداً مفيهاش أي نوع من أنواع الاستهدافات، وده بالظبط اللي خاصية الـ
App Tracking
بتعمله انها بتمنع فيس بوك من الحصول على الداتا بتاعة مستخدم الآيفون اللي بناء عليها بيتم استهدافه في الاعلانات.
الاعلان هيكون لكل الناس تقريباً، أي حد فيس بوك.. أما معيار الريتش فالمهندس قال انه هيكون بناء على التفاعل زي الريأكشن والكومنت والشير!
معنى كدة ان الاعلان كل ماكان بيجيب تفاعل أكتر كل الريتش بتاعه يعلى أكتر .. وده بدأ يثير مخاوف كبيرة جداً حول نوعية الاعلانات اللي هتتعمل.
قال كمان ان فيس بوك هيكون حريص على توجيه المستخدمين لنوعية المحتوى اللي هتكون مناسبة للنوع ده من الاعلانات، زي مثلاً حملات التوعية اللي هدفها الوصول لأكبر عدد من الناس بغض النظر عن الاستهداف.
الاعلانات دي هتكون رخيصة مقارنة بالاعلانات العادية وده لأن تفاصيلها أقل وهتمكن المحتوى من الوصول لعدد أكبر.
ملحوظة: خسائر فيس بوك من وراء خاصية الـ
App Tracking
مقدرة بـ 10 مليار دولار خلال عام 2022.
